सुर्खेतमा जेनजी आन्दोलनको ताण्डव : राजधानीमा व्यापक तोडफोड र आगजनी
सुर्खेत । कर्णाली प्रदेशको राजधानी वीरेन्द्रनगर मंगलबार जेनजी आन्दोलनको चपेटामा पर्दा ठुलो क्षति भएको छ। बिहानैदेखि सुरु भएको आन्दोलनले दिउँसो १२ बजेपछि उग्र रूप लिँदा राजनीतिक दलका कार्यालय, सरकारी भवन र नेताका निवासहरूमा व्यापक तोडफोड र आगजनी भएको छ।
राजधानीको शान्ति भंग गर्दै आन्दोलनकारीले दर्जनौँ स्थानमा क्षति पुर्याएका छन्। जेनजी आन्दोलनकारीले मुख्यतया राजनीतिक दलका कार्यालयहरूलाई निशाना बनाए ।
नेपाली कांग्रेस, नेकपा एमाले र नेकपा माओवादी केन्द्रका पार्टी कार्यालयहरूमा तोडफोड गरी आगजनी गरिएको छ। यसैगरी, वीरेन्द्रनगर नगरपालिकाको कार्यालयमा पनि तोडफोड भएको छ।
सरकारी सम्पत्ति र नेताका निवासमा निशाना
आन्दोलनकारीको आक्रोशबाट सरकारी सम्पत्ति र नेताका निजी निवासहरू पनि जोगिन सकेनन्। मुख्यमन्त्री तथा मन्त्रिपरिषद्को कार्यालयमा तोडफोड गरियो भने मुख्यमन्त्री यामलाल कँडेलको सरकारी निवास र भैरवस्थानस्थित निजी निवासमा समेत तोडफोड र आगजनी गरिएको छ।
नेपाली कांग्रेसका उपसभापति पूर्णबहादुर खड्काको वीरेन्द्रनगरस्थित निवास पनि तोडफोड र आगजनीको सिकार भयो। अन्य क्षतिहरूमा सरकारी वकिल कार्यालय सुर्खेतको गाडीमा आगजनी, प्रदेश लेखा नियन्त्रकको कार्यालयमा तोडफोड, नापी कार्यालयमा आगजनी र कर्णाली प्रदेश सभामा तोडफोड तथा आगजनी प्रमुख छन् ।
वीरेन्द्रनगरको सिटी हलमा पनि आगजनी र तोडफोड भएको छ। वीरेन्द्रनगर नगरपालिकाका उपप्रमुख नीलकण्ठ खनालको घर र वीरेन्द्रनगर नगरपालिका(६ को वडा कार्यालय भवनमा पनि तोडफोड र आगजनी भएको छ ।
यस आन्दोलनका क्रममा करिब १२ जना प्रहरी घाइते भएका छन् भने एक जना आन्दोलनकारी पनि घाइते भएको प्रहरीले जनाएको छ। जिल्ला प्रहरी कार्यालय सुर्खेतका प्रमुख सुधीरराज शाहीले आन्दोलनकारीमाथि कुनै गोली प्रहार नगरिएको जानकारी दिए।
उनका अनुसार वीरेन्द्रनगरमा सशस्त्र प्रहरी र नेपाल प्रहरी गरी करिब ४०० सुरक्षाकर्मी परिचालन गरिएको थियो।
बेलुका चार बजेतिर कर्फ्यु आदेश जारी गरिए पनि आन्दोलनकारीहरूले त्यसको अवज्ञा गर्दै प्रदर्शन जारी राखेका छन् । यस घटनाले वीरेन्द्रनगरको जनजीवन अस्तव्यस्त बनेको छ भने थप क्षतिको सम्भावना बढेको छ।
