राष्ट्रिय सभागृहमा आदिवासी जनजाति उत्थान राष्ट्रिय प्रतिष्ठानले आजदेखि शुरू गरेको आयोजना गरेको आदिवासी जनजाति ज्ञान सम्मेलनमा राउटेहरूले आफूले बनाएका भाँडा बिक्रीका लागि राखेका छन् ।
‘यो हामी राउटेले बनाएको भाँडो हो, यसको नाम कोशी (आरी) हो । तपाईंहरूले जे खानेकुरा पनि राख्न सक्नुहुन्छ । असाध्यै राम्रो छ । मूल्य एक हजार मात्र,’ सुदूरपश्चिमका दीपक राउटेले भने ।
उनीहरूको चाहना धेरैभन्दा धेरै भाँडा बिक्री भए हुन्थ्यो तर उनीसँग भाँडा किन्नेहरूभन्दा पनि उनीहरूसँगै बसेर फोटो खिचाउनेको भीड बढी थियो ।
आगन्तुकहरू तपाईं कहाँको राउटे ?, तपाईंको नाम के हो ? तपाईंले लगाउने लुगा केले बनेको हो ? यस्तै अनौठा प्रश्नहरू सोध्दै थिए ।
सम्मेलनमा सुदूरपश्चिमका चार जना राउटेहरूले ७० वटा कोशी (काठको भाँडो) बिक्री गर्नका लागि ल्याएको दीपकले बताए ।
दीपक यसअघि पनि काठमाडौं शहर आइसकेका छन् । उनले सुदूरपश्चिममा भाँडा बनाएर गाउँमा चामल, मकै र धानको साटो बेच्छन् । तर, काठमाडौंमा धान र मकै बोकेर फेरि घरसम्म पुग्न सास्ती हुने हुँदा भाँडा बेचेको सट्टा रुपैयाँ नै दिए हुन्थ्यो भन्ने आशा दीपकको रहेको छ ।
उनका अनुसार राउटे परम्पराअनुसार रुपैयाँ छुनु हुँदैन भन्ने मान्यता छ । ‘शहरमा भने रुपैयाँ न लिई सम्भव नहुने रहेछ,’ दीपक भन्छन्, ‘अब पैसा न छोए कसरी बाँचिन्छ ?’
दीपकले जङ्गलमा बस्ने राउटेले शहरीया जीवनसँग अलिकता आत्तिने गरेको अनुभव सुनाए । शहरको भीडभाड, अनि कोलाहलदेखि आफ्नो समुदायका मान्छे घुलमिल हुन निकै कठिन भएको उनले बताए । उनले शहरमा घुमेको अनुभव सुनाउँदै भने, ‘शहरका मान्छे धेरै बोल्छन् । हामीलाई झर्को लाग्छ ।’
सम्मेलनमा राउटे समुदायलगायत विभिन्न जनजाति समुदायको कला संस्कृति, परिकार, रहनसहन र खानपान झल्किने जीवनशैलीसमेत प्रदर्शनमा राखिएको छ ।
जसमा संयुक्त राष्ट्र सङ्घको कृषि तथा खाद्य सङ्गठन (एफएओ) नेपालले परम्परागत खाद्यको प्रवर्द्धन गर्न खाद्य प्रदर्शन गरेको थियो ।
कोदो, फापर, मकै, गहुँजस्ता अन्नबालीको नमूना प्रदर्शनमा राखेर स्वास्थ्यवर्द्धक र पौष्टिक आहार खानपान गर्ने सन्देश दिन खोजिएको एफएओ नेपालका कार्यक्रम प्रमुख मधुकुमार विश्वकर्माले बताए ।