अब एटीएमबाट एक दिनमा ५० हजार रुपैयाँसम्म मात्र झिक्न मिल्ने
सुर्खेत । अब डेबिट कार्डबाट एक दिनमा ५० हजार रुपैयाँसम्म मात्र निकाल्न मिल्ने भएको छ । नियामक नेपाल राष्ट्र बैंकले डेबिट कार्डबाट गर्ने कारोबारको सीमा घटाउने निर्णय गरेसँगै एक दिनमा बढीमा ५० हजार रुपैयाँ निकाल्न मिल्ने भएको हो ।
शुक्रबार राष्ट्र बैंकले भुक्तानी सम्बन्धी कारोबार गर्न अनुमति प्राप्त संस्थाहरूलाई पत्र पठाउँदै डेबिट कार्डबाट गरिने कारोबारको सीमा घटाउने निर्देशन दिएको छ ।
हालसम्म बैंक तथा वित्तीय संस्थाहरूबाट प्रति कारोबार २५ हजार, एक दिनमा एक लाख र एक महिनामा चार लाख रुपैयाँसम्म डेबिट कार्डबाट पैसा झिक्न सक्ने सुविधा थियो । अब भने एक पटकमा २० हजार, एक दिनमा ५० हजार र एक महिनामा तीन लाख रुपैयाँसम्म कार्डबाट झिक्न पाइनेछ ।
बैंक तथा वित्तीय संस्थाले जारी गर्ने प्रिपेड कार्डको कारोबार रकम भने परिवर्तन गरिएको छैन । प्रिपेड कार्डमार्फत प्रति कारोबार १० हजार रुपैयाँ, एक दिनमा २० हजार रुपैयाँ र एक महिना २ लाख रुपैयाँसम्म कारोबार गर्न सकिनेछ ।
बैंक तथा वित्तीय संस्था बाहेकका सेवा प्रदायक संस्थाले जारी गर्ने प्रिपेड कार्डबाट एक दिनमा पाँच हजार र एक महिनामा २५ हजार रुपैयाँसम्मको कारोबार गर्न सक्छन् ।
त्यसैगरी क्रेडिट कार्डको सीमा पनि राष्ट्र बैङ्कले यथावत् राखेको छ ।
